Interlingua/Curso de conversation/Capitulo 6, Scenas 3 e 4 (interlingua)

SCENA 3: Le aeroporto de Frankfurt e le officios del senior Runde: Quando le scena comencia, Petro telephona le senior Runde, dicente que tosto ille essera in su officio post un breve viage in un taxi. Illes parla sur le aeroporto de Frankfurt e se demanda lo que occurreva con Sophia, le secretaria del senior Runde, qui iva portar Petro al officios de Elektrobahn in Frankfurt in un automobile del compania. Le senior Runde pare esser confidente que su secretaria retornara tosto. Petro tunc vole saper si ille potera parlar interlingua durante le conferentia. Le senior Runde dice que isto essera possibile, specialmente si ille parla assatis lente- e specialmente clarmente. Illes anque parla sur le duration del reunion, e le senior Runde vole saper si il ha alique special que Petro necessita pro su presentation. Petro responde que ille ha venite con omne lo que ille necessita. Tunc Petro dice que ille volerea cognoscer un pauco le operationes de Elektrobahn, e le senior Runde dice que ille dara a Petro con multo placer un tour del officios e del fabrica de su compania post lor reunion. Petro: Bon die. Io es Petro Minelli. Io es in Frankfurt in le aeroporto. Como? Excusa me, io non vos audi. Ascolta, senior Runde, io es in le aeroporto e tosto prendera un taxi pro vader a vostre officio. Senior Runde: Ma io ha inviate Sophia, mi secretaria, con un automobile pro apportar vos a mi officio. Esque illa non ha arrivate al aeroporto? Petro: Io non la ha vidite. Senior Runde: Povre Sophia. Petro: Io suppone que illa vos telephonara quando illa essera troppo frustrate post essayar trovar me. Senior Runde: Ah, certemente, si. Il es multo facile perder se in un aeroporto. On poterea cercar alicuno omne un septimana sin trovar le. Petro: Io ha vidite un loco appellate le Treffpunkt. Esque isto es le loco ubi nos debe trovar nos? Senior Runde: Si, ma io mesme ha difficultates in trovar passageros in ille Treffpunkt. E il ha plus que un de ille punctos, e lor uso pote esser multo frustrante a vices. Petro: Intertanto, il non il non ha multo que on pote facer pro vostre secretaria. Senior Runde: Vos ha ration. Il non ha ullo que on pote facer. Sophia revenira al officio eventualmente, sin dubita. Si vos trova un taxi, prende lo. Il es multo facile perder multo tempore in le aeroporto de Frankfurt. Petro: Un altere cosa importante: Esque io pote parlar interlingua in le conferentia iste postmeridie? Senior Runde: Si, naturalmente. Nos omnes parla interlingua assatis ben. Ma vos debera parlar lente e clarmente. Petro: Io crede que nos non habera multe difficultates con le communication in ille caso. Senior Runde: Nos non ha habite problemas con le uso de interlingua in omne nostre reuniones usque nunc. Petro: Le reunion comencia a duo horas, nonne? Senior Runde: Si, vos ha ration. Petro: E generalmente quante tempore dura illos? Senior Runde: Vostre parte del reunion durara generalmente un sol hora. Post illo, nos habera altere reuniones inter nostre proprie personal. Petro: Si, io comprende. Usque nunc, io non ha apprendite exactemente que face vos illac. Esque vos pote dar me un parve tour. Senior Runde: Si naturalmente. Ah, un altere cosa: Esque vos habera besonio de cosas special pro vostre presentation, como photocopias o altere cosas similar? Petro: No, io ha con me omne lo que io necessita. Senior Runde: Esque vos ha un description imprimite de vostre projecto? Petro: No. Io va simplemente exponer le grande lineas del projecto e explicar le programma que nos ha establite pro Geneva de maniera que vos sapera como vos pote usar nostre servicios nove. EXERCITIO 3: Fixar un incontro con alicuno. Guida: Io me demanda qual es le melior maniera de fixar un incontro con alicuno. Un femina: (Parlante in le telephono) Mercuridi. Mercuridi postmeridie. A que hora arriva le traino? Tres horas trenta. Al station principal. Qual es le melior loco pro incontrar alicuno? Sub le horologio. In le medio del station. Si, multo ben. Tres horas trenta in le medio del station. Gratias. Un homine: Hallo? Il es io. Un femina: Bon die. Como sta vos? Un homine: Multo ben, gratias. Un femina: Que die arriva vos? Un homine: Mercuridi. Un femina: E como va viagiar vos? Un homine: Per le traino. Un femina: Esque nos pote incontrar nos post vostre viage? Un homine: Naturalmente. Io pote incontrar vos in le station principal. Un femina: A que hora? Un homine: Io essera illac verso tres horas e medie. Un femina: E si le traino veni retardate? Un homine: In ille caso, esque vos pote attender me? Un femina: Si, naturalmente. Io vos attendera in le exito. Un homine: Il ha multe exitos. Un femina: Esque io pote attender vos in le restaurante? Un homine: Il ha multe restaurantes. Un femina: Tunc ubi pote io attender vos? Un homine: Eh, ben. Que nos nos incontra sub le horologio. Un femina: Ubi es le horologio? Un homine: Illo es in le medio del station. Un femina: Multo ben. Io vos incontra verso tres horas e medie. Un homine: A revider. Un femina: A revider. Guida: Io me demanda si le ingenieros german comprendera le interlingua de Petro. SCENA 4: Frankfurt: Un sala de conferentias: Petro parla al conferentia e explica le systema nove de reuniones regular planificate pro le ingenieros principal del companias que participa in le projecto Geneva. Ille propone quatro themas de discussion in iste reuniones. Quando ille ha finite, le senior Runde le offere caffe e tunc da a ille un tour del officios e del fabrica de Elektrobahn. Post le tour, ille invita Petro a un bibita e offere monstrar Frankfurt a ille. Al fin del scena illes vade al officio de designo. Petro: Bon die. Infelicemente, io non parla ben le germano, ma on me ha dicite que vos pote comprender me si io parla interlingua. Senior Runde: Illo es ver, si vos parla clar e lentemente. Petro: Si io parla de un maniera clar e lente. Multo ben. Io es in iste reunion pro parlar un pauco a vos sur le nove projecto Marex Mundial in Geneva. Nos nos ha installate illac recentemente, e nos nunc comencia nostre operationes. Nos vole inaugurar un systema de reuniones specialmente ante que nos comencia un projecto nove. Ma nos anque vole inaugurar un systema de reuniones mensual regular pro communicar informationes e ideas. Le prime reunion essera in Geneva, le secunde in Paris, le tertie in London, e le quarte hic in Frankfurt. Nos habera iste reuniones omne le anno in cata un ex iste citates successivemente. Io propone que nos discute quatro themas principal. Le prime essera nove developpamentos technic, le quales includera nove formas de locomotion o nove recercas sur motores, systemas de assemblage, etc. Le secunde essera le construction, le installation de vias, e systemas auxiliar, como systemas de securitate. Le tertie concernera systemas de controlo de signales e traffico. Isto includera systemas informatic e innovationes electronic e mechanic. Il es essential que omne nos cognosce le developpamentos nove, specialmente le nove systemas magnetic e pneumatic e altere possibilitates technologic in systemas de transportation urban. In omne iste areas, ideas nove nasce quasi cata septimana. E pro mantener nostre superioritate competitive, nos sempre debe saper lo que es disponibile. Senior Runde: Ben. Petro: Esque vos ha caffe in iste officio? Senior Runde: Si naturalmente. Ecce illo. Vos pote vos servir, si vos vole. Petro: Gratias. Senior Runde: Io nunc pote monstrar vos nostre fabrica, si vos vole. Petro: Si, multe gratias. Senior Runde: Nos anque pote visitar le officio de planification. Nos ha tres fabricas in Germania. Le fabrica de Frankfurt es le plus grande de ... Ecce le departimento de machinas--essentialmente motores electric de grande potentia. Vos potera vider le catena de assemblea illac. Petro: E iste motores es destinate a que? Senior Runde: Principalmente pro projectos in Germania. Iste gruppo hic va a Hannover. Dice me, ubi es vostre hotel? Petro: Presso le station ferroviari. Senior Runde: Vos volerea haber un bibita con me iste vespere? Petro: Ah, si, un idea excellente! Senior Runde: Il ha unes areas multo agradabile in Frankfurt. Petro: Ah si? Senior Runde: Io poterea monstrar vos unes, si vos vole. Petro: Con multe placer. Vos es multo amabile. Senior Runde: Le officio de planification es in basso. Vamos examinar lo brevemente. EXERCITIO 4: Invitar alicuno a sortir. Guida: Nos ha vidite que iste vespere Petro ha sortite pro un bibita como in Paris. Bon. Il ha manieras de invitar personas a sortir e manieras de responder si o no a un invitation. Io volerea audir unes ex illos. Un homine: Vole vos sortir iste vespere pro un bibita? Un femina: Io lo regretta, ma io non pote facer lo hodie. Un homine: Vermente? Un femina: Io lo regretta, ma io vermente non ha le tempore. Un homine: Eh, ben, forsan un altere die. Possibilemente deman? Un femina: No, io lo regretta, ma io non pote. Un homine: Forsan venerdi? Un femina: Si, io non ha ullo a facer venerdi. Que nos sorti venerdi vespere.