Interlingua/Curso de conversation/Capitulo 4, Scenas 5 e 6 (interlingua)

Capitulo 4, Scenas 5 e 6 (interlingua) SCENA 5: Paris, al Hotel de Petro: In iste scena Petro ha unes problemas con le empleato in le area de reception del hotel, qui es minus que cooperative in verificar su reservation e in facer le sentir benvenite. Finalmente, post plenar un formulario, Petro es obligate a pagar anticipatemente ante que on le da un camera pro dormir. Petro: Bon vespere. Empleato: Si, senior? Petro: Io volerea un camera. Empleato: Si, senior? Petro: Io ha reservate un camera in iste hotel ... Empleato: Ah si? Petro: ... in le nomine de Minelli, Petro Minelli. Empleato: Hmm. Petro: Mi avion esseva retardate a causa del tempore mal. Empleato: Un camera de un lecto o de duo? Petro: De un lecto. Empleato: Con banio? Petro: Ducha. Empleato: Plena iste formulario, per favor, nomine, nationalitate, omne illo. Isto es pro un nocte solmente? Petro: No. Tres noctes. Empleato: Tres noctes? Petro: Io ha facite un reservation. De Geneva. Io esseva in Geneva e io reservava un camera de un lecto pro tres noctes desde iste vespere. Ma mi avion arrivava retardate a causa del tempore mal. Mi nomine es Minelli, em, i, en, i duple el, i. Mi compania es Marex Mundial. Vos debe haber omne iste information scribite in vostre officio. Nos ha inviate un telex pro confirmar. Empleato: Isto essera tres centos euros, per favor. Petro: Tres centos euros? Empleato: In anticipation. Petro: Ascolta. Io ha reservate iste camera. Vos ha un confirmation. Un telex. Esque vos pote cercar lo in vostre officio? Empleato: Le officio es claudite. Petro: Esque il ha un persona responsabile pro le servicio a vostre clientes qui travalia iste nocte? Empleato: Post le medienocte, on debe pagar in anticipation. Petro: Ma, isto is complete incomprehensibile! Empleato: Tres centos euros, per favor. Petro: Bon, bon. Multo bon. Empleato: Camera quaranta nove. EXERCITIO 5: Reservar un camera de hotel: Guida: Bon. Al minus, Petro ha un camera pro dormir. Io volerea studiar le parolas que on usa pro reservar un camera de hotel. Un homine: Io volerea reservar un camera, per favor. Un femina: Le cliente va dicer quante tempore ille vole usar le camera. Un homine: Io volerea un camera pro tres noctes, per favor. Un femina: Ille anque va dicer si ille vole un camera con un o duo lectos ... Un homine: Un camera con un lecto, per favor. Un femina: ... e si ille vole un camera con banio o con un ducha. Un homine: Un camera con un lecto e con un banio, per favor. Un femina: Ille nunc va dicer omne illo in un sequentia. Un homine: Io volerea un camera con un lecto con banio pro tres noctes, per favor. Un femina: Ille anque vole saper le precio. Un homine: Qual es le precio? Un femina: Que nos dice que illo es cento novanta euros pro un nocte. Ille nunc vole saper lo que ille compra con iste cento novanta euros. Un homine: Esque illo include le camera e le jentaculo o solmente le camera? Un femina: Le duo cosas, le camera e le jentaculo. Un homine: E qual es le precio del jentaculo? Un femina: Vinti euros, ma illo es includite in le precio del camera. Un homine: Multo ben. Io prende le camera. Un femina: Ecce le clave. Le numero del camera es septanta duo. Un homine: Ubi se trova la camera septanta duo? Un femina: In le septime etage. Un homine: Esque vos pote eveliar me a septe horas deman matino? Un femina: Con multe placer. Un homine: Gratias. Bon nocte. Un femina: Bon nocte. Guida: Eh ben. Pro ille, trovar un camera esseva minus difficile que pro Petro. E io spera que ille ha ben dormite. SCENA 6: Paris, un centro de conferentias: Petro es nunc in le sala de conferentias e face le prime cognoscentia de Gerardo Florette. Gerardo demanda a Petro si su viage a Paris in avion esseva confortabile e si a ille place su hotel. Petro dice que su avion arrivava tarde e que ille habeva unes difficultates con le empleato del hotel ante que ille recipeva le clave a su camera. Gerardo anque demanda a Petro como sta Catherina e postea dice a Petro que le conferentia non ha ulle nove productos o systemas a offerer a su participantes. Petro tunc vide le senior Melville, le empleato de un compania competitor con le sue, e il pare que il va haber un lucta verbal inter illes. Un femina: Bon die. Petro: Bon die. Le femina: Vos es ... Petro: Petro Minelli, de Marex Mundial. Le femina: Ah, si, senior Minelli. Ecce vostre carta de identification. Ah, il ha un senior qui vos attende. Petro: Ah, bon. Le femina: Ille es illac, apud le fenestra. Petro: Gratias. Excusa me. Gerardo: Petro Minelli? Petro: Si, es io. E vos debe esser Gerardo Florette. Gerardo: Exactemente. Esque vos ha habite un viage bon a Paris desde Geneva? Petro: Le avion in le qual io volava arrivava retardate. Gerardo: A causa del tempore mal? Petro: Si. E io anque habeva unes difficultates con le empleato del hotel a causa de haber arrivate retardate. Gerardo: Vermente? Petro: Ma il non esseva multo grave. Io poteva arreglar omne sin difficultate. Gerardo: Io detesta le hotels. Como es le cosas a Geneva? E como es Catherina? Petro: Catherina sta ben. Il non ha ullo extraordinari in Geneva. Nos solmente comencia nostre operationes, e nos non ha multe travalio. Gerardo: Ah, non vos plange. Petro: Et hic? Como es le presentation? Gerardo: Assatis ben. Nullo special. Sempre le vetule cosas. Petro: Que? Ma illes sempre parla de systemas de controlo completemente integrate. Gerardo: Si, ma illo es sempre le mesme cosa. Petro: Io credeva que iste vice illes habeva alique nove a monstrar nos. Gerardo: Deo mie, no. Petro: Tunc pro que es vos hic? Gerardo: Il es melior que esser sempre in le officio. Petro: Ma qual perdita de tempore! Gerardo: Possibilemente. Ma il es plus agradabile que prender the in un hotel de luxo. Petro: Eh, qui es ille, illac? Gerardo: De qui parla vos? Petro: Le homine in ille habito brun? Gerardo: Il me pare que io le cognosce. Petro: Io mesme, io le cognosceva durante un viage recente in avion. Gerardo: Ah si? Petro: Io vole parlar a ille. Eh, senior Melville, io ha unes parolas a dicer a vos. Guida: Io es curiose de saper lo que Petro va dicer al senior Melville. Pro discoperir lo, que nos ascolta le proxime scena.